ነበርቲ ዓዲ-ጎምቦሎ ጽርግያኦም ጸጊኖም

ኣብ ዞባ ማእከል – ነፍሒ፡ ነበርቲ ዓዲ-ጎምቦሎ ጉልበቶምን ገንዘቦምን ኣወሃሂዶም ብዝወሰድዎ ተበግሶ፡ ብማሽነሪ ተደጊፎም ናይ ሓመድ ጽርግያ ጸጊኖም።

እቲ ካብ ቀንዲ መስመር ኣስመራ – መንደፈራ ናብ ዓዶም ዝኣቱ ናይ ሓመድ ጽርግያ ብምብልሻዉ፡ ኣብ ምንቅስቓስ ተሽከርከርቲ ጸገም ክፈጥር ምጽንሑ ዝሓበረት – ኣመሓዳሪት ምምሕዳር ከባቢ ሰላዕ-ዳዕሮ ወ/ሮ ኣልማዝ ዳኒኤል፡ በቲ ስራሕ እቲ ኩነታት ከምዝመሓየሽ ዘለዋ እምነት ገሊጻ።

ነበርቲ ዓዲ-ጎምቦሎ፡ ዕለታዊ ህይወቶም ብኣሉታ ክጽሎ ምጽንሑን፡ ግፍሒ ጽርግያ ካብ 5 ሜትሮ ናብ 10 ሜትሮ ከምዝወሰኸን እውን ሓቢራ።

ሓላፊ ምምሕዳርን ፋይናንስን ንኡስ ዞባ ጋላ-ነፍሒ ኣቶ ተወልደ ሃብታይ ብወገኑ፡ እቶም ነበርቲ – ቀረብ ዝስተ ማይ ንምውሓስ እውን ሓዳስ ዒላ ከምዝዀዓቱ ብምሕባር፡ ካልኦት ዓድታት ሕጽረታተን ንምምላእ ተመሳሳሊ ተበግሶታት ክወስዳ ኣዘኻኺሩ።

ዓዲ-ጎምቦሎ፡ ካብ ኣስመራ ንሸነኽ ደቡብ 13 ኪሎ-ሜተር ርሒቓ ትርከብ።