መደበር ፈልሲ ንኡስ ዞባ ሰገነይቲ፡ መደባት ምግራብ ንምዕዋት፡ ኣብ ወርሒ ሰነ ብምኽንያት መዓልቲ ሰማእታት ዝትከል ልዕሊ 45 ሽሕ ፈልሲታት ከምዘዳለወት ተሓቢሩ።
ኣብ ቤት-ጽሕፈት ሚኒስትሪ ሕርሻ’ቲ ንኡስ ዞባ፡ ክኢላ ምግራብን ዕቃበ እንስሳ ዘገዳምን ኣቶ ሮቤል ተስፋይ፡ እቲ ፈልሲታት፡ ኣብ 18 ምምሕዳራት ከባቢ፡ ኣብ ከተማ ሰገነይቲ፡ ናይ እምነት ቦታታትን ቀጽሪ ውልቀ-ገረብትን ክትከል መደብ ከምዘሎ ገሊጹ።
ውሑስ ሓለዋን ቀረብ ማይን ንኽረክብ፡ ምስ ምምሕዳር ብምርድዳእ ይስራሓሉ ከምዘሎ ጠቒሱ ድማ፡ ብተበግሶ ሰራሕተኛታት መንግስትን ህዝብን ጐዳጉዲ ይዳሎ ከምዘሎ ሓቢሩ።
ኣብ ንኡስ ዞባ ሰገነይቲ በብዓዱ ዝተሓዝአ ኣስታት 2000 ሄክታር ሕሩም ሕዛእቲ ከምዘሎ፡ ብሰንኪ ዘይጽኑዕ ሓለዋን ሸለልትነት ዓድታትን ግን መብዛሕትኡ ከም’ቲ ዝድለ ከምዘይሰሰነ ኣቶ ሮቤል ኣገንዚቡ።
እቲ ኣብ ከባቢታት ኣኽሩር፡ ዓዲ ሓዲድን ምዕራባዊ ከተማ ሰገነይትን ዝርከብ ግና፡ ብዝግበረሉ ሓለዋን ክንክንን ጽቡቕ ለውጢ ኣርእዩ ከምዘሎ ገሊጹ።
