ኣብ ንኡስ ዞባ ጎዳይፍ፡ ኣብ ኣመሪካን ካናዳን ዝነብሩ ዜጋታት ዝለኣኽዎ 100 ሽሕ ናቕፋ፡ ብምኽንያት በዓል ትንሳኤን ዒድ ኣልፈጥርን – ን100 ስድራ-ቤታት ስውኣትን ጽጉማት ወገናትን ተመቓሪሑ።
ብ21 ሚያዝያ ኣብ ዝተኻየደ ስነ-ስርዓት ምክፍፋል ናይ’ቲ ሓገዝ፡ ኣመሓዳሪት ንኡስ ዞባ ጎዳይፍ ወ/ሮ ትብለጽ ተወልደ ኣብ ዘስመዓቶ ቃል፡ ጽጉም ወገንካ ምሕጋዝ – ሓደ ካብ ክብሪታት ህዝቢ ኤርትራ ምዃኑ ብምዝኽኻር፡ ነቶም ገንዘባዊ ኣበርክቶ ዝገበሩ ግዱሳት ዜጋታት ኣመስጊና።
ሓገዝ ዝተገብረሎም ነበርቲ፡ በብከባቢኦም ተለልዮም ዝቐረቡ ምዃኖም ዝሓበረት ኣመሓዳሪት ምምሕዳር ከባቢ ኤክስፖ ወ/ሮ ወይኒ መስፍን ብወገና፡ ካልኦት ዜጋታት’ውን ተመሳሳሊ ኣበርክቶ ክገብሩ ተላብያ።
ኣወሃሃድቲ ናይ’ቲ ሓገዝ፡ ተመሳሳሊ ደገፍ ኣብ እዋን መኸተ ለበዳ ኮሮና ቫይረስ እውን ክግበር ምጽንሑ ብምጥቃስ፡ ብዝተወሃሃደ መልክዕ ክቕጽልን ካልኦት ክጽንበርዎን ኣዘኻኺሮም።
