ኣብ ንኡስ ዞባ ሞጎሎ፡ ካብ ናይ ዝሓለፈ ዓመት ልምዓታዊ መደባት፡ እቶም 84 ሚእታዊት ከም እተተግበሩን፡ ተሳትፎ ህዝቢ ልዑል ምንባሩን፡ ኣብ ዝተኻየደ ገምጋማዊ ኣኼባ ተሓቢሩ።
ኣብ ዝቐረበ ጸብጻብ፡ ኣብ’ቲ ንኡስ ዞባ ክሕረስ ካብ ዝተወጠነ መሬት እቲ ዝዓበየ ክፋል ከምእተሓርሰ፣ ኣስታት 100 ሽሕ ጥሪት ንምኽታብ ዝተጀመረ መደብ ጽቡቕ ይሰላሰል ከምዘሎ፣ ንቕሓት ሕብረተ-ሰብ ኣብ ተጠቃምነት ትካላት ጥዕና ዕብየት ከምዘመዝገበ፣ ዕድመኦም ንትምህርቲ ዝኣኸለ ቈልዑ ኣብ መኣዲ ትምህርቲ ክሳተፉ ዝተገብረ ጻዕሪ ኣተባባዒ ውጽኢት ከምዝተረኽቦ ተገሊጹ።
ኣመሓዳሪ’ቲ ንኡስ ዞባ ኣቶ ኣብርሃም ኪዳነ፡ መደባት ምዕቃብ ሓመድን ማይን፣ ምእካብ ግብሪ መሬት ሕርሻን ጥሪትን፣ ኮም ዝመርሖ መደባት ከባብያዊ ጽሬት፣ ከምኡ’ውን ኣገልግሎታት ትምህርትን ጥዕናን፡ ኣብ 2022 ዓቢ ቈላሕታ ዝወሃቦም መደባት ምዃኖም ሓቢሩ።
