ተጋዳላይ መሓመድ-እድሪስ ኢብራሂም ተሰዊኡ

ኣብ ሚኒስትሪ ቱሪዝም ዋና ዳይረክተር ክፍሊ ኣገልግሎት ቱሪዝም – ገዲም ተጋዳላይ መሓመድ-እድሪስ ኢብራሂም (ሳንቶ)፡ ብ4 ለካቲት 2022 ኣብ መበል 70 ዓመት ዕድመኡ፡ ብሕማም ተሰዊኡ።

ኣብ ወርሒ ጥሪ 1975 ኣብ ህዝባዊ ሓይልታት ሓርነት ኤርትራ ዝተሰለፈ ገዲም ተጋዳላይ መሓመድ-እድሪስ፡ ኣብ እዋን ሓርነታዊ ቃልሲ፡ ኣብ ክፍሊ ሕክምና ውድብን ተዋጋኢ ሰራዊትን ብዝተፈላለየ ጽፍሕታት ሓላፍነት፣ ድሕሪ ናጽነት ድማ ኣብ ኮሚሽን ኣባይቲ፡ ህዝባዊ ግንባር ንደሞክራስን ፍትሕን፡ ካብ 2003 ክሳብ ዕለተ መስዋእቱ ድማ፡ ኣብ ሚኒስትሪ ቱሪዝም – ብደረጃ ዋና ዳይረክተር፡
ንህዝቡን ሃገሩን ብተወፋይነት ዘገልገለ ሓርበኛ እዩ።

ገዲም ተጋዳላይ መሓመድ-እድሪስ ኢብራሂም (ሳንቶ)፡ በዓል ሓዳርን ኣቦ ክልተ ደቂን እዩ።

ስነ-ስርዓት ቀብሩ፡ ትማሊ ቀዳም 5 ለካቲት ሰዓት 4፡00 ድሕሪ-ቐትሪ፡ ኣብ መካነመቓብር ሓርበኛታት ኣስመራ ተፈጺሙ።

ሚኒስትሪ ቱሪዝም ብመስዋእቲ ኣባሉ – ገዲም ተጋዳላይ መሓመድ-እድሪስ ኢብራሂም (ሳንቶ) ዝተሰመዖ ሓዘን እናገለጸ፡ ንስድራ-ቤቱ፡ መቓልስቱን መሳርሕቱን ጽንዓት ተመንዩ።