ኣብ ንኡስ ዞባ ፎርቶ-ሳዋ – ምምሕዳር ከባቢ ሆሚብ ዝተሃንጸ ፕሮጀክት ማይ፡ ኣብ መነባብሮ ህዝቢ ለውጢ ከምዘምጽአ፡ ኣመሓዳሪ ምምሕዳር’ቲ ከባቢ ኣቶ ወሃጅ ዑስማን ሓቢሩ።
እቲ ብፕሮጀክት ዓዲ-ሃሎ ዝተሃንጸን ብጸሓያዊ ጸዓት ዝሰርሕን ፕሮጀክት ማይ፡ ካብ ሩባ ሳዋ ዝተዘርግሐ ሓደ ኪሎ-ሜተር ሻምብቆታት፡ 2 ዓበይቲ ኣጋንእን 6 መዐደሊ ማይ ነቑጣታትን ዘጠቓለለ እዩ።
ልዕሊ 6 ሽሕ ነበርቲ ዘለውዋ ምምሕዳር ከባቢ ሆሚብ፡ ካብ ፎርቶ-ሳዋ ንሸናኽ ሰሜን 30 ኪሎ-ሜተር ርሒቓ ትርከብ።
እዚ ከምዚ’ሉ እንከሎ፡ ካብ ፎርቶ-ሳዋ ክሳብ ኣዲባራ ዝወስድ ናይ ሓመድ ጽርግያ ይስራሕ ኣሎ።
እቲ 20 ሜተር ዝምግፍሑ ናይ ሓመድ ጽርግያ፡ ዛጊት ካብ ፎርቶ-ሳዋ 15 ኪሎ-ሜተር ሰጒሙ ከምዘሎ፡ ነቲ ፕሮጀክት ዝመርሕ ዘሎ ኢንጅነር ዳዊት ዓንደብርሃን ገሊጹ።
