ሃገራዊ መልቀቒ ፈተና 2ይ ደረጃ ማለት ማትሪክ ናይ ዓመተ 2020፡ ካብ 16 ክሳብ 21 መጋቢት ክካየድ ምዃኑ፡ ማእከል ፈተና ሃገራዊ ኢንስቲትዩት ላዕለዋይ ትምህርትን ምርምርን ሓቢሩ።
ብመሰረት’ቲ ሓበሬታ፡ ኣብ ቤትትምህርቲ ዋርሳይ-ይከኣሎ – ሳዋ ስሩዕ ትምህርቶም ዝከታተሉ ተመሃሮ ኣብ ቤት-ትምህርቶም፡ ተመሃሮ ኣብያተትምህርቲ ስነ-ኪነት ዞባታት ኣኣብ ዝመሃሩሉ ቤት-ትምህርቲ፡ ተመሃሮ ኣብያተ-ትምህርቲ ስነ-ኪነት ኣስመራ ከምኡ’ውን ናይ ምሸታውን ዳግማይ ተፈተንትን ድማ ኣብ ቀጽሪ ኤክስፖ ክፍተኑ’ዮም።
ንፈተና ዝምልከት ኣገዳሲ ሓበሬታ ኣቐዲሙ ክወሃብ ምዃኑ ዘነጸረ’ቲ ማእከል፡ ኣብ ኣስመራ ንዝፍተኑ ተመሃሮ ንዕለት 13 መጋቢት ኣብ ኤክስፖ፡ ኣብ ዞባታት ንዝፍተኑ ድማ ንዕለት 15 መጋቢት ኣብ ዝፍተኑሉ ማእከል ክርከቡ ኣተሓሳሲቡ።
ብዘይካ’ዚ ተፈተንቲ፡ ተወሳኺ ሓበሬታ ብዛዕባ መምርሒታትን ኣገባባትን ፈተና ምስ ዝደልዩ፡ ካብ’ቲ ዝተመዝገቡሉ ቤትትምህርቲ ወይ መፈተኒ ማእከል ክረኽቡ ከምዝኽእሉ ወሲኹ ኣረዲኡ።
