ኣብ ንኡስ ዞባ ኣፍዓበት፡ ጽሬት ከባቢ ንምውሓስ ክካየድ ዝጸንሐ ጻዕሪ፡ ኣብዚ ዓመት’ዚ ብምልኣት ንምትግባሩ ብዝለዓለ ይስራሕ ከምዘሎ ተሓቢሩ።
ኮሚተ ጥዕና ከባቢ፡ ኣመሓደርቲ ከባቢ፡ ሓለፍቲ ኣካላት ሚኒስትሪታትን ሃገራውያን ማሕበራትን ኣብ ዝተሳተፍዎ ርክብ፡ ካብ ጨንፈር ሚኒስትሪ ጥዕና እቲ ንኡስ ዞባ፡ ኣቶ ኣልኣሚን መሓመድ-ዓሊ፡ ንኣተሓሕዛ እቲ መደብ ኣብ ዝምልከት ሰፊሕ መብርሂ ሂቡ።
ኣመሓዳሪ ንኡስ ዞባ ኣፍዓበት ኣቶ ኣሕመድ መሓመድ-ኑር ረጀብ ድማ፡ መደባት ጽሬት ከባቢ ኣብዚ ዓመት’ዚ ብምልኣት ንምትግባር ወጺኡ ዘሎ ውጥን ንምዕዋት፡ ኩለን ዓድታት ዝግባእ ኣድህቦ ክህባኦ ኣዘኻኺሩ።
ተሳተፍቲ፡ ጐሓፍ ኣብ ፈቖዶኡ ከይድርበ ምክትታል ክግበር፡ ጽጉማት ስድራ-ቤታት ሓገዝ ክግበረለን፡ ከባቢ ዝብክል ተግባራት ዝፍጽሙ ብሕጊ ክሕተቱ. . . ዝብሉን ካልኦትን ርእይቶታት ኣቕሪቦም።
