ህዝቢ ን/ዞባ ፎሮ፡ ንኣባላት ሓይልታት ምክልኻል ኣተባቢዑ

ህዝቢ ንኡስ ዞባ ፎሮ፡ ኣብ ምስራሕ ጽርግያ ደምሒና-ፎሮ ንዝሳተፉ ዘለዉ ኣባላት ሓይልታት ምክልኻልን ኩባንያ ብድሆ ሓፈሻዊ ህንጸትን፡ ብ23 ለካቲት ናይ ምሳሕ እንግዶት ብምግባር ኣተባቢዕዎም።

ኣብ’ቲ ኣመሓደርቲ ዞባታት ሰሜናዊ ቀይሕ ባሕሪን ደቡብን፡ ኣዘዝቲ ሰራዊትን ካልኦት ሰብ-መዚን ዝተረኽቡሉ ኣጋጣሚ፡ ኣመሓዳሪ ንኡስ ዞባ ፎሮ ኣቶ ዑስማን ዓረፋ፡ ምስ’ቶም ኣብ ምስራሕ ጽርግያ፡ ራህያታትን ኣብያተትምህርቲን ዝነጥፉ ዘለዉ ኣባላት ሰራዊት ማእከላይ እዚን ኩባንያ ህንጻ ብድሆን ሓቢርካ ምውዓል፡ ሞራል ንምስናቖምን ምስጋና ንምቕራብን ምዃኑ ገሊጹ።

“ምስ ሰራዊት ልምዓት ምውዓልና ሓጐስ ይስመዓና” ዝበሉ ወከልቲ ህዝቢ ብወገኖም፡ ኣብ ከባቢኦም ዝሰላሰል ዘሎ መደባት ልምዓት – ንምጥርናፍ ዓድታትን ምምሕያሽ መነባብሮ ህዝቢን ሓጋዚ ብምዃኑ፡ ብዓቕሞም ንምዕዋቱ ከምዝሰርሑ ኣረጋጊጾም።

ኣብ’ቲ ብባህላዊ መሰናድኦ ዝደመቐ ኣጋጣሚ፡ ኣብ’ቲ ስራሕ ፍሉይ ተራ ንዝነበሮም ሰባት ህያብ ተበርኪቱ።