ሰልዓ – ነበርቲ ኣፍልጦኦም ኣብ ጥዕና እናበረኸ ከምዝመጽአ ይገልጹ

ነበርቲ ንኡስ ዞባ ሰልዓ፡ ጥዕናኦም ንምውሓስ ኣብ ትካላት ጥዕና እናመጽኡ ዝገብሩዎ ዘለዉ ምክትታል፡ መርኣያ ናይ’ቲ እናበረኸ ዝመጽእ ዘሎ ንቕሓት ምዃኑ፡ ሓላፊ ማእከል ጥዕና’ቲ ንኡስ ዞባ ነርስ ዘመንፈስ ገብረልዑል ሓቢሩ።

ነርስ ዘመንፈስ፡ ኣብቲ ንኡስ ዞባ ኣብ ጣህራን፡ ሕሩምን ክልተ መደበራት ጥዕና፡ ኣብ ርከብ ድማ ማእከል ጥዕና ኣገልግሎት ይህባ ከምዘለዋ፡ ይኹን’ምበር ካብተን ምምሕዳራት ከባቢ ናብተን ትካላት ጥዕና ዝኣቱ ጥጡሕ ጽርግያ ብዘይምህላዉ፡ ብፍላይ ንነብሰ-ጾራት ኣዝዩ ኣሰካፊ ጉዳይ ኮይኑ ከምዘሎ ኣገንዚቡ።

እታ ማእከል ጥዕና፡ ንነብሰ-ጾራት መጸበዪ ዝኸውን ክፍልታት፡ ከምኡ’ውን ተወሰኽቲ ኣባላት ስለዘድልያ፡ ዝምልከቶም ኣካላት ኣቓልቦ ክገብሩ ድማ ተላብዩ።

ነበርቲ፡ ቀዳማይ ረዲኤት ብዝተማህሩ ደቂ-ዓዲ ኣብ ሰሙን ክልተ ግዜ፡ ብዛዕባ ተመሓላለፍቲ ሕማማት፡ ክንክን ጥንስን ሕርስን፡ ክታበት. . . ኣገዳሲ ጐስጓሳዊ ሓበሬታ ይወሃቦም ከምዘሎ ገሊጾም።