ሓልሓለ – ፓይሎት ፕሮጀክት ናይ ጸባ ከብቲ ኣብ ጽቡቕ ደረጃ በጺሑ

ኣብ ከባቢ ድባርዋ ዝርከብ – ብኮርፖረሽን ዘራእትን ጥሪትን ኤርትራ ዝካየድ ዘሎ ፓይሎት ፕሮጀክት፡ ኣብ ዘተኣማምን ደረጃ ከምዝበጽሐ – ኣካያዲ ስራሕ’ቲ ኮርፖረሽን ሜጀር ክብርኣብ ኣብርሃም ሓቢሩ።

ሜጀር ክብርኣብ፡ እቲ ፕሮጀክት ኣብ 2017 ኣብ ከባቢ ድባርዋ ዝጀመረሉ ምኽንያት፡ እቲ ቦታ – ምቹእ ክሊማ፡ ጸጋታት ማይን ስቡሕ መሬትን ስለዘለዎ ምዃኑ ኣረዲኡ።

ዕላማ’ቲ መደብ፡ ፍርያት ጸባን ውጽኢቱን ብምስሳን፡ ኣብ ቀረብ ዘሎ ሕጽረታት ንምምላእን ብርትዓዊ ዋጋ ናብ ህዝቢ ምቕራብን ምዃኑ ብምሕባር፡ ናይ ጸባ ከብቲ ብ660 ዝተጀመረ፡ ሎሚ 2 ሽሕ ከምዝበጽሓ ኣረዲኡ።

ነቲ መደብ ንምዕዋት፡ ልዕሊ 500 ሄክታር መሬት ከም እተዋደደ፡ ብዲግሪ፡ ዲፕሎማን ሰርቲፊኬትን ዝተመረቑ 180 ተመሃሮ፡ ተመኵሮታቶም የዕብዩሉ ከምዘለዉ፡ ንልዕሊ 600 ነበርቲ ከተማ ድባርዋን ከባቢኣን ናይ ስራሕ ዕድላት ከምዝፈጠረ ድማ ገሊጹ።

ኣካያዲ ስራሕ ናይ’ቲ ፕሮጀክት መንእሰይ ተኽለ ለገሰ ብወገኑ፡ ኣብቲ ትካል 2 ምሩጻት ዓሌታት ናይ ጸባን ስጋን ከብቲ ከምዘለዋን፡ ጥዕናአን ኣብ ጽቡቕ ደረጃ ከምዝርከባን፡ ሓንቲ ላም ድማ ኣብዚ ግዜ’ዚ – 36 ሊትሮ ጸባ ከም እትሕለብ ሓቢሩ።