ኣብ ከተማ ኣቑርደት፡ ብሰንኪ ምድፋን ዒላ፡ ምብልሻው መጨንጒዒን እርጋን ሻምብቆታትን ዝተኸስተ ጸገም ዝስተ ማይ ንምቅላል፡ ኣገዳሲ ስጒምቲ ከም እተወስደ፡ ሓላፊ ልምዓት ማይ ንኡስ ዞባ ኣቑርደት ገሊጹ።
ኣቶ ብርሃነ መሓሪ፡ ዝኣረገ ሻምብቆታት ከም እተቐየረ፡ ኣብ ሰዓታት ዕደላን ክፍሊት ኣገልግሎትን እውን ምምዕርራይ ንምግባር መደብ ከምዘሎ ሓቢሩ። ኣጋጢሙ ዝነበረ ሽግር ከምእተቓለለ ኣፍሊጡ።
ቊጽሪ ቦጣት እውን ብምውሳኹ፡ እቲ ኣገልግሎት ክሳብ’ተን ዝረሓቓ ዓድታት – ዓድ-ቁስላይ፡ ሕለት-ቀስብን ካልኦትን ከም ዝበጽሐ ኣረዲኡ።
ነበርቲ፡ ዝጸንሖም ጸገም ማይ ብፍላይ ኣብ እዋን ሓጋይ – ካብ ወርሒ ሚያዝያ ክሳብ ወርሒ ሰነ ይኸብድ ምንባሩ፡ ኣብ’ዚ እዋን’ዚ ግን ፍታሕ ብምርካቡ ጾሮም ከምእተፋኾሰ ገሊጾም። ክፍሊት ማይ ዳግመ-ግምት ክግበረሉ ድማ በዚ ኣጋጣሚ ተማሕጺኖም።
