ፈስቲቫል ኤርትራውያን ነበርቲ ኣውስትራልያ ተዛዚሙ

ዓመታዊ ፈስቲቫል ኤርትራውያን ተቐማጦ ኣውስትራልያ፡ ካብ 12 ክሳብ 15 ጥሪ ኣብ ከተማ መልበርን ብልዑል ሃገራዊ መንፈስ ተቓኒዑ።

እቲ “ብርሃን ንደርማስ ምዕባለ” ኣብ ትሕቲ ዝብል ቴማ ዝተኻየደ ሃገራዊ ምትእኽኻብ፡ ስነ-ህንጻ ከተማ ኣስመራ ዘንጸባርቕ ስእላዊ ምርኢት፡ ሰሚናር ኣብ ህልው ኩነታት፡ ባህላውን ኣዘናጋዕን መደባት፡ ኣብ ጥዕናን ዕደናን ዘተኰረ ኣስተምህሮ፡ ስፖርታዊ ውድድራትን ካልእ ትሕዝቶን ዘጠቓለለ ነይሩ። ብዝተፈላለየ መሰናድኦታት ዝደመቐ “መዓልቲ ስድራ-ቤታት” እውን ተወዲቡ።

ወከልቲ ውዳበታት ማሕበረ-ኮማት – ህግደፍ፡ ሃማደኤን ካልኦትን ዝተሳተፍዎ ገምጋም ንጥፈታት ተኻዪዱን፡ ማሕበረ-ኮማት ብሓያል ውዳበ ክሰርሓ ተወሲኑን።

ኣብ መዛዘሚ ናይ’ቲ ካብ መላእ ኣውስትራልያ ዝመጹ ኤርትራውያንን ኣዕሩኽ ኤርትራውያንን ዝተሳተፍዎ ፈስቲቫል፡ ኣብ ውድድራት ስፖርት ንዝተዓወቱ ሽልማት ተዓዲሉ።

ጠቕላሊ ቈንስል ሃገረ-ኤርትራ ኣብ ኣውስትራልያን ኒውዝላንድን ኣቶ መሓሪ ተኸስተ፡ እቲ ፈስቲቫል ብኹሉ መለክዒታት ዕዉት ምንባሩ ድሕሪ ምሕባር፡ ጽቡቕ ኣበርክቶ ንዝነበሮም ምስጋና ኣቕሪቡ።